Santiago de Compostela, como cidade patrimonial da Unesco e punto final de camiños, é un destino internacional de primeira magnitude. O turismo é por tanto unha importante fonte de riqueza, crecemento económico e creación de emprego para a cidade, mais tamén un fenómeno que atravesa a vida cotiá da veciñanza e condiciona a propia forma urbana da capital de Galicia. Ambas as dúas dimensións, en toda a súa complexidade, precisan conciliarse.

O Concello e a Universidade de Santiago estamos a traballar conxuntamente na construción dun Pacto Local por un Turismo Sostible. Trátase de dotar a nosa cidade dun modelo de gobernanza turística de nova xeración que nos axude, contando cos distintos actores implicados e con toda a diversidade e pluralidade de perspectivas, a conciliar as potencialidades deste sector coas necesidades, as preferencias e o confort da cidadanía.

Este proxecto, enmarcado no Plan de Sostibilidade Turística que o consistorio está a desenvolver en colaboración coa Xunta de Galicia e o Ministerio de Industria e Turismo, articúlase a través dun convenio entre o Concello e a Universidade que traballa tamén na renovación do modelo turístico e de desenvolvemento sostible da cidade, o estudo das dinámicas do turismo e os seus efectos e a análise de ferramentas de xestión no ámbito local. Santiago debe situarse como un destino de turismo consciente e responsable e promover unha visita máis tranquila, completa e respectuosa, e polo tanto máis satisfactoria para turistas, persoas que completan a súa experiencia de peregrinación e a propia veciñanza.